Asistimos, tanto n’EE. XX. como n’Europa, a una ofensiva reaccionaria que paez nun tener llendes: despreciu pola llexislación internacional y les sos instituciones; usu de la guerra económica y de la guerra convencional pa caltener la hexemonía unipolar de los USA, con consecuencies catastrófiques pa pueblos enteros, dende’l xenocidiu contra’l pueblu palestín a l’amenaza de desañiciu d’Irán, pasando pela agresión a Venezuela y el cercu por fame de Cuba.
Nun paez que l’imperialismu norteamericanu y los sos vasallos europeos vayan detenese ehí; a xulgar poles declaraciones diaries de Donald Trump y pol discursu programáticu de Marco Rubio na reciente conferencia de Munich, el so oxetivu caberu ye recuperar el dominiu de la raza blanca d’orixe européu y cristianu sobre’l restu del mundiu. Un discursu qu’aplaudieron los dirixentes europeos ellí presentes.
La consecuencia necesaria d’esa política de supremacismu global ye la promoción en cada estáu de fuercies polítiques ultraconservadores o abiertamente fascistes, les úniques enteramente fiables pa sirvir con eficacia a esi proyectu. El fascismu y la guerra vuelven a ser l’horizonte probable de les nuestres sociedaes.
Sabemos que de baxo del proyectu imperialista renováu y del so discursu ideolóxicu, añera una fonda crisis del capitalismo USA, incluyida la del so sector financieru, perentellazáu col capitalismu européu (dicir Macrón, Merz, De Guindos, Draghi ye dicir Goldman Sachs y Blackrock…). La improbable superación d’esa crisis confíase a un control esclusivu sobre les materies primes y les fontes d’enerxía globales, y tamién al aumentu drásticu de la esplotación del trabayu, cola subordinación a la finanza, non solo del aforru y el consumu, sinón tamién de la vivienda, la salú, la educación, les pensiones y los recursos naturales. La entera vida de les poblaciones.
El capitalismu “español”, como parte indisoluble d’esi capitalismu euro-atlánticu, comparte esi proyectu y vien promocionándolu y financiándolu nel Estáu español dende hai tiempu. Los sos medios de comunicación y les sos redes sociales consiguieron llevantar una fola reaccionaria que tien como oxetivu la estroza de los drechos políticos, sociales y económicos de la mayoría de la población trabayador. Esperiméntase dende les comunidaes autónomes gobernaes pol PP y Vox; degradando y privatizando la sanidá, la educación, l’atención a la tercer edá; amenazando los drechos y llibertaes fundamentales; imponiendo la xenofobia y l’odiu a les persones migrantes; cuestionando los drechos de los territorios del Estáu español; promoviendo una ofensiva total escontra’l feminismu y el movimientu LGBT; intentando imponer un integrismu político-relixosu y espardiendo una ideoloxía belicista.
Nesti contestu, el calter paliativu de la política reformista del gobiernu de coalición, centrada nel IMV, el salariu mínimu, la intervención sobre’l costu de la enerxía, etc., anque se trate de midíes indispensables, fai que resulten insuficientes p’afrontar los problemes de fondu. A lo que s’añade la precariedá parllamentaria y la incapacidá p’aprobar un presupuestu. El gobiernu actual no tien, polo tanto, les ferramientes básiques p’actuar con eficacia, nun sentíu democráticu, frente a los trés aspectos fundamentales de la crisis: la crisis económica, la crisis social y la crisis ecolóxica. A pesar d’ello, los poderes fácticos nun consideren fiable al gobiernu de coalición pa efectuar el rearme, l’austeridá que conlleva y los necesarios recortes de les llibertaes democrátiques, d’ehí los sos bracos esfuercios por acabar darréu cola llexislatura.
Resistir a esa ofensiva reaccionaria nun va ser fácil, pero nun va poder faese entregándose a la resinación y el mal menor. Amás del imperativu éticu pa toa esquierda, de resistir, hai elementos que permiten afirmar que ye dable derrotar el proyectu reaccionariu: hai abondes incertidumes sobre l’ésitu del proyectu imperialista, qu’afronta resistencies internes y esternes poderoses, al empar que padez contradicciones económiques esplosives. Las resquiebres puen apaecer aína. En tou casu la percepción d’esa enorme presión esterna, aunida a la reacción interna, pue contribuyir a venceyar a una esquierda con unes divisiones qu’amenacen con llevar a l’abstención a bona parte de los sos votantes nes próximes cites electorales, na midida en que la división produz frustración.
Sicasí, nun hai namás la movilización de la drecha, yá hai movilizaciones importantes de la esquierda en torno a cuestiones como la violencia machista y homófoba, los daños ecolóxicos, la vivienda, la sanidá, la educación, o l’antirracismu y los drechos democráticos, tamién en comunidaes autónomes onde la drecha yá gobierna. Ye fundamental unificales alredor d’un programa tresformador que movilice a tola esquierda pa derrotar con francura al proyectu reaccionariu.
Esi programa, a pesar de la urxencia, tien de ser frutu del discutiniu colectivu; nun pretendemos tener, llistes pa usar, un garapiellu recetes. Avanzamos, en tou caso, delles propuestes que surdieron na nuestra plática, centraes nel ámbitu d’Asturies y cola sola pretensión de ser un puntu d’aniciu pa un debate constructivu.
- Pola paz, escontra les guerres y el xenocidiu en cursu, amás de les que tán entamando. La so guerra ye’l so negociu y la nuestra perdición.
- Pol caltenimientu y ampliación de les conquistes de les muyeres y el movimientu LGBTI. Escontra la xenofobia, el racismu y el colonialismu. Pola solidaridá ente y colos pueblos oprimíos. Pol reforzamientu de los drechos humanos.
- Pola preservación del únicu planeta que tenemos en condiciones aptes pa la vida humana digna. Escontra los desastres climáticos y ambientales provocaos pola cobicia capitalista, que, nel casu d’Asturies, inclúi’l turismu masivu y esmaniáu. Midíes escontra la destrucción del mediu ambiente vexetal y animal, y tamién escontra’l maltratu animal.
- Por una política económica que tienda a la eliminación de la probeza a traviés de la redistribución; teniendo como oxetivu’l plenu emplegu, dignu y de calidá, promoviendo nuevos nichos d’emplegu que curien el mediu ambiente y prevengan el deterioru d’infraestructures básiques pa la vida colectiva. Creación d’una banca pública asturiana.
- Impuestos proporcionaos al nivel de renta, con gravámenes mui fuertes a les rentes milmillonaries, que posibiliten la promoción de viviendes, sanidá y de servicios públicos de calidaá.
- La salú ye un estáu de completu bienestar físicu, mental y social, y non solamente l’ausencia d’afecciones o enfermedaes (O.M.S.). Garantizar el drechu a la salú supón la intervención sobre los sos determinantes sociales y económicos, nuna concepción integral. Necesitamos reforzar una sanidá pública y universal, qu’incluya servicios como la salú mental, la protección y curiáu dental… y que goce d’una financiación acordies a les sos necesidaes. Non a la privatización y a la instalación n’Asturies de los grandes grupos privaos, como Quirón y Rivera. Tamién esiximos una financiación apropiada del Plan d’Atención a la Dependencia, y la reversión al sector públicu de los sos amplios segmentos privatizaos.
- Educación pública de calidá, con una financiación apropiada, dende’l ciclu 0-3 años a la Universidá. Desarrollu real de polítiques d’igualdá nel ámbitu educativu. Non a los conciertos educativos y al aterrizaxe de les universidaes privaes pa ricos.
- Pol caltenimientu del poder adquisitivu de les pensiones y el so ameyoramientu, atendiendo sobre manera a les más baxes. Pola vuelta a la xubilación obligatoria a los 65 años, ensin perda de drechos económicos.
- Vivienda pa tol mundiu: promoción de vivienda pública, en propiedá o n’arriendu. Midíes pa controlar y restrinxir la xuba de los precios de la vivienda, na compra o nel arriendu. Midíes llegales y penales frente a los grandes grupos propietarios o promotores de viviendes pa evitar la so influyencia na asignación de los precios nel mercáu de la vivienda.
- Escontra la corrupción: Castigu penal a los corruptos y a los que promueven la corrupción. Escontra la corrupción política: castigu penal al usu sistemáticu de la mentira y la creación y difusión de bulos como preséu políticu.
- Exixencia de creación d’un marcu político-institucional asturianu que faiga posible algamar estos oxetivos, y tamién la normalización de la llingua asturiana, a traviés de la oficialidá. Midíes pa favorecer una mayor calidá democrática, per aciu de la participación popular na toma de decisiones.
Ye namás un entamu, dicíamos. Col optimismu de la voluntaá y una razón non necesariamente pesimista. L’aunión nun ye solo la condición necesaria pa derrotar l’amenaza fascista, yelo tamién pa esparder les conquistes democrátiques qu’esa derrota va abrir. Nun va ser l’azar quien decida, sinón la nuestra responsabilidá.
Deja un comentario